Prutl

Koyrikort til bólk AM kota 175 – lítið prutl, gevur rætt at koyra

  • Lítið prutl

 

Persónur skal hava fylt 15 ár fyri at fáa koyrikort til lítið prutl og venjingarakstur kann í fyrsta lagi byrja, tá umsøkjarin er 14 ár og 6 mánaðir.

Prutlfrálæran skal vera givin av lærara í frítíðarundirvísingini (kvøldskúla), ið lýkur fakligar og námsfrøðiligar førleikar ella einum koyrilærara, ið er góðkendur til bólk A (motorsúkklu).

Umsøkjarin skal bæði til eina ástøðiliga og eina verkliga roynd.

 

Umsøkjarin skal lata fylgjandi skjøl til Akstovuna:

  • Umsókn um koyrikort
  • Eginváttan um heilsu
  • Prógv fyri loknum skeiði í fyrstuhjálp í ferðsluni fyri ungar prutlførarar, um umsøkjarin ikki hevur fylt 18 ár.
  • Dóps- ella navnabræv
  • Væltroffin mynd (hattleys)
  • Gjald fyri ástøðiliga og verkliga roynd fyri persónar, sum eru yngri enn 18 ár: 150 kr.
  • Gjald fyri útgávu av koyrikorti fyri persónar, sum eru yngri enn 18 ár: 150 kr.
     

 

Koyrikort til bólk AM – stórt prutl, gevur rætt at koyra

  • Lítið prutl
  • Stórt prutl
  • Stórt prutl íkoplað ein viðfestan vogn

 

Persónur skal hava fylt 16 ár fyri at fáa koyrikort til stórt prutl, men venjingarakstur kann í fyrsta lagi byrja 3 mánaðir áðrenn viðkomandi er 16 ár.

Frálæran til stórt prutl skal vera givin av einum koyrilærara, ið er góðkendur til bólk A (motorsúkklu).

Umsøkjarin skal bæði til eina ástøðiliga og eina verkliga roynd.

 

Umsøkjarin skal lata fylgjandi skjøl til Akstovuna:

  • Umsókn um koyrikort
  • Læknaváttan (ikki eldri enn 3 mánaðir)
  • Prógv fyri loknum skeiði í fyrstuhjálp í ferðsluni fyri ungar prutlførarar, um umsøkjarin ikki hevur fylt 18 ár.
  • Dóps- ella navnabræv
  • Væltroffin mynd (hattleys)
  • Gjald fyri ástøðiliga og verkliga roynd: kr. 550
  • Gjald fyri útgávu av koyrikorti fyri persónar, sum eru yngri enn 18 ár: 150 kr.
  • Gjald fyri útgávu av koyrikorti fyri persónar, sum hava fylt 18 ár: 250 kr.

 

Umsøkjarin verður stillaður inn av einum góðkendum koyrilærara, har báðir váttað á serstakt øki á umsóknini.

 

Víðkan av koyrikorti frá lítlum til stórt prutl

Sambært koyrikortkunngerðini, eru ásettar reglur um, at persónar sum hava fylt 16 ár og sum í minsta lagi hava royndir sum førari av lítlum prutli í 1 ár, við støði í koyrikorti til lítið prutl, hava rætt til at koyra stórt prutl, bólkur AM, sbrt. § 5 a, nr. 2 í koyrikortkunngerðini.

Hetta merkir, at koyrikortið til lítið prutl, bólkur AM – kota 175, eisini er galdandi til stórt prutl, bólkur AM.


Mælt verður tó til at umbýta koyrikortið til lítið prutl við eitt koyrikort til stórt prutl


Av tí at koyrikortið til lítið prutl, bólkur AM hevur kotu 175 (lítið prutl) á, verður mælt til, at prutlkoyrikortið verður býtt um við eitt nýtt koyrikort til stórt prutl, bólkur AM eftir hesum treytum:

 

  •  Umsøkjarin má lata inn umsókn um koyrikort – broytingar
  •  Áður útgivið koyrikort til lítið prutl skal latast Akstovuni
  •  Læknaváttan til koyrikort – ikki eldri enn 3 mánaðir
  •  Prógv fyri loknum skeiði í fyrstuhjálp í ferðsluni fyri ungar prutlførarar – ikki eldri enn 1½ ár. Tey sum hava tikið koyrikort til lítið prutl sum 15 ára gomul, hava longu latið inn fyrstahjálparprógv, og tí er ikki neyðugt við nýggjum fyrstahjálparprógvi, um tað er yngri enn 1½ ár
  • Gjald fyri útgávu av koyrikorti til persónar, sum eru yngri enn 18 ár: 150 kr.


Lítla prutlið má broytast og skrásetast sum stórt prutl


Er prutlið upprunaliga typugóðkent sum stórt prutl, skal tað broytast frá lítlum prutli til stórt prutl. Hetta kann verða gjørt hjá forhandlara ella góðkendum verkstaði.


Prutlið skal sýnast av nýggjum á Akstovuni. Biðið má verða um tíð til sýnið. Góðkenningarsýn kostar 350 kr.